முகப்புவிமர்சனம்

ஹவுஸ் ஹஸ்பென்ட் கதை எப்படி இருக்கிறது? - 'ஆண் தேவதை' விமர்சனம் - Aan Devathai Movie Review

  | Friday, October 12, 2018

Rating:

ஹவுஸ் ஹஸ்பென்ட் கதை எப்படி இருக்கிறது? - 'ஆண் தேவதை' விமர்சனம் - Aan Devathai Movie Review
  • பிரிவுவகை:
    ஃபேமிலி ட்ராமா
  • நடிகர்கள்:
    சமுத்திரக்கனி, ரம்யா பாண்டியன், பேபி மோனிகா, மாஸ்டர் கவின், காளி வெங்கட், இளவரசு
  • இயக்குனர்:
    தாமிரா
  • தயாரிப்பாளர்:
    அஹமத் ஃபக்ருதீன், குட்டி
  • எழுதியவர்:
    தாமிரா
  • பாடல்கள்:
    ஜிப்ரான்

வேலைக்கு செல்லும் மனைவி, குழந்தைகளையும் குடும்பத்தையும் கவனிக்க ஹவுஸ் ஹஸ்பென்ட் ஆகும் கணவர், இவர்களுக்குள் நடக்கும் வாழ்க்கை சிக்கல்கள்தான் கதை.

தங்களுக்கு என யாரும் சொந்த பந்தம் இல்லாத இளங்கோவும் (சமுத்திரக்கனி), ஜெசிகாவும் (ரம்யா பாண்டியன்) இருவரும் திருமண பந்தத்தில் இணைகிறார்கள். ஆதிரா, அகரமுதல்வன் என இரண்டு குழந்தைகள் பிறக்கிறார்கள். அவர்களை கவனித்துக் கொள்ளவே முடியாமல் வேலை வேலை என இருவரும் ஓடுவது சமுத்திரக்கனிக்கு அதிருப்தி கொடுக்கிறது. யாராவது ஒருவர் வேலையைவிட்டு வீட்டை கவனித்துக் கொள்ள வேண்டும் என சமுத்திரக்கனி பேச்செடுக்க, `எனக்கு நிறைய கனவுகள் இருக்கு. அதை எல்லாம் நான் இழக்க முடியாது' என மறுத்துவிடுகிறார் ரம்யா. எனவே தன் வேலையை ராஜினாமா செய்துவிட்டு ஹவுஸ் ஹஸ்பென்ட் ஆகிறார் சமுத்திரக்கனி. அதன் பின் குடும்ப சூழல் எப்படி மாறுகிறது, அதனால் என்ன பிரச்சனை வருகிறது, அது சரியாகிறதா என்பதை எல்லாம் சொல்லியிருக்கிறது `ஆண் தேவதை'

சிக்கலான ஒரு விஷயத்தை வைத்து கதை செய்திருக்கும் விதத்தில் கவனிக்கி வைக்கிறார் இயக்குநர் தாமிரா. ஆனால், அது எவ்வளவு இயல்பாகவும், அழுத்தமாகவும் இருக்கிறது என்பதில்தான் பிரச்சனை ஆரம்பிக்கிறது.

நடிகர்கள் பொருத்தவரை தங்களுக்கு கொடுக்கப்பட்ட எல்லோரும் சிறப்பாகவே நடித்திருக்கிறார்கள். குடும்பத்தை எந்த தீங்கும் நேராமல் பாதுகாக்க வேண்டும் என்ற தவிப்பு, எதுவும் செய்ய முடியாமல் வரும் இயலாமை, குழந்தைகளின் குறும்புகளை சமாளிப்பது என தன்னுடைய கதாபாத்திரத்தை உணர்ந்து நடித்திருக்கிறார். ரம்யா பாண்டியனின் அந்த சிடுசிடு குணம், கோபத்தில் கத்துவது எல்லாவற்றிலும் எந்தக் குறையும் இல்லாமல் நடித்திருக்கிறார். ஆதிராவாக நடித்திருக்கும் பேபி மோனிகா செம க்யூட். குழந்தைகளுக்கே உரிய அந்த மழலைத்தனம் மாறாமல், `நாம அதுக்கு நேரா போயி கடவுள்கிட்டயே கேட்ரலாமே' என்பதாக பேசி நடிப்பது எல்லாம் சிறப்பா இருந்தது. மாஸ்டர் கவின் பூபதி நடிப்பும் நன்று. சுஜா வருணி, காளிவெங்கட், அபிஷேக், இளவரசு, அறந்தாங்கி நிஷா என நிறைய பேர் படத்தில் தங்கள் சிறப்பான பங்களிப்பை செய்திருக்கிறார்கள். சிறப்புத் தோற்றத்தில் வந்து செல்லும் ராதா ரவி, கராரான கடன் வசூல் பார்ட்டியாக வரும் ஹரீஷ் பெரேடி ஆகியோரும் சிறப்பு.

ஆனால், இந்த நடிகர்களின் நடிப்பு மட்டும் படத்தைக் காப்பாற்றிவிடுமா? ஒருகட்டத்தில் படத்தில் சீரியல் தன்மை வருவதை தவிர்க்க முடியவில்லை. இன்னொன்று படம் பேச வருவது எதைப் பற்றியது, ஹவுஸ் ஹஸ்பன்ட் பற்றியதா? குடும்பம் எப்படி இருக்க வேண்டும் என்பதா? ஒரு பெண் குடிக்கக் கூடாது என்பதா? கடன் வாங்கக் கூடாது என்பதா? இல்லை எல்லாமுமா?. அப்படி எல்லாமும் பேசு பொருளாக இருந்தால், அவற்றுக்குள் இருக்கும் சிக்கல்களை முழுமையாக சொல்லாமல் வெறுமனே பிரசங்கம் மட்டும் பண்ணிக் கொண்டிருப்பது எந்த விதத்தில் நியாயம். "நாளைக்குங்கறது என்னைக்கும் நாளைக்காதான் இருக்கும். இன்னைக்குதான் நிஜம்" என்பது மாதிரியான சில வசனங்கள் மட்டும் கவனிக்க வைக்கிறது. ஆனால், ஒருகட்டத்துக்கு மேல் இயல்பையும் மீறிய காட்சிகளும் வசனங்களும் ரொம்பவே பொறுமையைச் சோதிக்கிறது. `பர்ஸ்யூட் ஆஃப் ஹேப்பினஸ்' படத்தின் தாக்கம் நிறையவே இருப்பதும், அதை டைட்டில் கார்ட்டிலேயே போட்டிருப்பதும் ஓகே. ஆனால், மகளுடன் கிளம்பும் சமுத்திரக்கனியின் பயணம் அவ்வளவு பெரிய தாக்கத்தை ஏற்படுத்தாமல் நகர்வது பிரச்சனை.

ஜிப்ரானின் இசை படம் பேச நினைக்கும் உணர்வுகளை இசை மூலம் திறம்பட கடத்துகிறது. நிகரா நிகரா பாடலும் இதம். டெக்னிகலாக படத்தில் எந்தக் குறையும் இல்லை என்பது ஆறுதல். ஹவுஸ் ஹஸ்பன்ட் என தமிழுக்கு புதிதான ஒரு களத்தை எடுத்துக் கொண்டாலும், படத்தில் புதிதாகவோ, இயல்பாகவோ, அலுத்தமாகவோ எதுவும் இல்லை என்பது படத்தின் பிரச்சனையாக இருக்கிறது. குடும்ப உறவுகள் பற்றி எடுத்துச் சொல்வதும், பகட்டு வாழ்க்கைக்கு ஆசைப்பட்டு நாம் ஓடி என்ன செய்யப் போகிறோம் என்பதை சொன்னது கவனிக்க வைக்கிறது. ஆனால், அதைச் சொன்ன விதம் இன்னும் கச்சிதமாக இருந்திருக்கலாமே என்பதுதான் ஒரு குறை.

குடும்பத்துடன் ஒரு படம் எனப் பார்க்க நினைக்கும் நபர்களுக்கு `ஆண் தேவதை' முதலுக்கு மோசமில்லாத தேர்வுதான்.

விளம்பரம்
விளம்பரம்
விளம்பரம்